El mga autoridad ya confisca valor de P871,900 smuggled cigarillo na dos separao operaciones contra smuggling na Zamboanga Peninsula, asegun con el policia del Martes.
Asegun con Police Brigadier General Bowenn Joey Masauding, el director del mando regional del policia o Police Regional Office-9 (PRO-9), con el mga smuggled cigarillo ya confisca na provincia del Zamboanga Sibugay y Zamboanga del Norte.
Si Masauding ya habla, P700,000 del P871,900 valor de confiscao smuggled cigarillo ya confisca mga alas 6:30 del Domingo aga na un pantalan na Barangay Laih, Siay, Zamboanga Sibugay.
Asegun con Masauding, el mga confiscao cigarillo compuesto de 36 cajon y 70 reams de diferentes clase de cigarillo que ya abandona el dueño cuando ya gole con el presencia del policia.
Con el mga confiscao smuggled cigarillo ya lleva na quartel del policia del municipio de Siay, Zamboanga Sibugay, para el propio disposicion.
Na un separao operacion, el mga pulis ya confisca valor de P171,900 smuggled cigarillo mga alas 10:45 del Sabado denoche na Sitio Bunkhosue, Barangay Sirawai proper, Sirawai, Zamboanga del Norte.
Asegun con Masauding, un desconocido persona el enseguidas ya escapa muntando un banca con makina y ya abandona con el mga cigarillo cuando ya columbra le con el mga pulis.
El mga pulis ya confisca tres cajon de smuggled cigarillo tapao de bonote.
Con el mga confiscao ciragillo ya lleva na quartel del policia del municipio del Sirawai para el propio disposicion.
Si Masauding ya alaba con el mga pulis del Zamboanga Sibugay y Zamboanga del Norte por el de ila buen acomplisimiento contra smuggling. (B. Garcia)