Si Captain Emma McDonald-Kerr, el Defense Attache del Australia, ya reitera el promesa del Australia para suporta con el Fuerza Armada del Filipinas, particularmente con el Western Mindanao Command, na campaña para sustene paz y proteje el integridad nacional y soberania.
Si McDonald-Kerr ya hace el reiteracion durante su visitada na quartel del Westmincom del Lunes, propositao para hace una llamada de cortesia con el liderato del mando.
Durante su visitada, ya acompania con McDonald-Kerr el mga personajes desde’l Australia Defence Force Task Force 12.
Asegun con McDonald-Kerr, el objeto del su visitada amo para engrana con el de ila contrapartido del Estados Unidos base na Campo Navarro y liderato del Westmincom.
El junta ya concentra na dalida de informacion na materia de mutual interes.
Si Brigadier General Taharudin Ampatuan, el diputado comandante para el operaciones interno de defensa del Westmincom, y mga oficiales del mando ya extende un caluroso bienvenida durante el llegada del mga distinguido visita del Lunes.
Si Ampatuan ya transmiti el gratitud y suporta del liderato del Westmincom con el fuerza de defensa y gobierno de Australia.
“El junta es un buen evento para ase fortalece de aton relacion como ta continua kita trabaha para el paz, establidad, y prosperidad na region de Asia-Pacifico,” ya habla si Ampatuan. (B. Garcia)