El mga autoridad ya puede confisca mas de P1 millon valor de droga ilegal despues de dos horas tirahan contra con el mga conocidos vendedor de droga na provincia del Lanao del Sur, asegun con el Philippine Drug Enforcement Agency (PDEA) del Jueves.
Sin embargo, si Gil Cesario Castro, el director de PDEA na Bangsamoro Autonomous Region in Muslim Mindanao (BARMM), ya habla cay ya puede escapa el mga suspechao amediante el tirahan.
Asegun con Castro, el dos horas tirahan ya comensa mga alas 6 del Miercoles aga na Barangay Kilikili East, Wao, Lanao del Sur.
Si Castro ya habla, el tirahan ya ocuri despues que tiene mga desconocidos armao personas ya tira cuando ya columbra sila con el mga autoridad quien para servi orden de buscada contra con Salman Ontawar Mundas, un conocido vendedor de droga ilegal.
Asegun con Castro, si Mundas y su mga cohortes ya puede escapa amediante el tirahan contra con mga autoridad.
Asegun con Castro, ya puede sila recubri na lugar de escondida de Mundas cuatro paquetes de suspechao shabu, un pesador, documentos financial que ta indica el actividad de droga ilegal del suspechao, dos licensias de chufer, y mga parafernales de droga.
Asegun con Castro, el operacion de servida de orden de buscada ya concudi el mga agentes del PDEA na BARMM con el suporta del policia y militar. (B. Garcia)