Un armero el ya aresta y ya confisca mga armas de fuego de alta calibre y otros pa mga autoridad na un operacion de aplicacion de ley na provincia del Zamboanga Sibugay, asegun con el policia del Martes.
Si Police Brigadier General Bowenn Joey Masauding, el Director del Mando Regional del Policia, ya nombra lang con el arestao armero como un tal Gaga.
Asegun con Masauding, con Gaga ta aresta na un operacion de aplicacion de ley por medio de servida de un orden de buscada mga alas 7:30 del Lunes aga na Purok Mangga, Barangay Kima, Payao, Zamboanga Sibugay.
Asegun con Masauding, ya confisca na posesion de Gaga dos rifles Armalite, dos KG9 rifles automatico, un pistola KG9; tres shotgun de dose balina, cuatro calibre .38 revolver, y un calibre .22 pistola.
Asegun con Masauding, ya puede tamen confisca mga bala de diferentes calibre, mga partes de armas de fuego de otro-otro calibre y arimienta de armero.
El orden de buscada contra con Gaga ya dale el un corte na municipio de Ipil, Zamboanga Sibugay.
Asegun con Masauding, con Gaga ya entrega na custodia del policia na municipio del Payao, Zamboanga Sibugay para el propio disposicion.
(B. Garcia)
