El mga autoridad ya aresta cuatro personas y ya confisca P159,052 valor de droga ilegal na un operacion contra droga na provincia del Lanao del Sur, asegun con el policia del Domingo.
Si Police Colonel Robert Daculan, el director del policia na Lanao del Sur, nohay mas nombra con el cuatro arestao suspechao, con quien ya aresta el mga operativas de diferente unidades del policia.
Asegun con Daculan, con el cuatro suspechao ya aresta na un operacion de compra busto mga alas 9:20 del Viernes denoche na Barangay Bito Buado Itowa, ciudad de Marawi, Lanao del Sur.
Asegun con Daculan, con el cuatro suspechao ya aresta despues que ya vende sila 20.39 gramos de suspechao shabu que tiene el valor de P138,652 con un secreta del policia.
Durante el de ila aresto, si Daculan ya habla, ya puede recubri na de ila posesion otro tres gramos de suspechao shabu con el valor de P20,400.
Si Daculan ya habla, el valor de shabu ya confisca na posesion del mga suspechao ya alcansa na total de P159,052.
Asegun con Daculan, ya recubri tamen desde’l posesion del mga suspechao un motorciclo y mga parafernales de droga ilegal.
Asegun con Daculan, con el mga arestao suspechao y el mga evidencia ya recubri na de ila posesion ya entrega na policia del ciudad de Marawi, Lanao del Sur, para el propio documentacion y en preparacion para el plantada del caso contra canila. (B. Garcia)