Gitaho sa Police Regional Office 7 nga malinawon ug malampuson ang gihimong fluvial procession alang sa 460th Fiesta Señor ug Sinulog Festival 2025 niadtong Sabado sa buntag, Enero 18, 2025.
Nikabat sa 342 ka mga sakayan sa kadagatan ang milahutay sa Mactan Channel uban sa mga deboto ug sagradong imahe sa Santo Niño aron makauban ang balaang imahe pauli sa Basilica Minore del Santo Niño sa Sugbo.
Nagsugod ang prusisyon alas-6:34 sa buntag sa Isla sa Mactan. Gipakita usab niini ang MV Santo Niño, usa ka bag-ong sakayan gikan sa Medallion Transport Inc., isip nag una nga sakayan sa kalihukan.
Gipakatap ang 703 ka personnel sa PRO7 aron masiguro ang kaluwasan ug seguridad sa mga deboto ug partisipante.
Sa usa ka pamahayag, gipasalamatan ni PRO7 Regional Director Police Brigadier General Redrico Maranan ang pag organisa ug epektibong mga lakang sa seguridad atol sa kalihukan. Giawhag usab niya ang mga unit commanders nga palig-onon ang ilang mga inisyatiba batok krimen aron mapadayon ang malinawong selebrasyon sa Sinulog.
“We have carefully prepared for this event to ensure its smooth execution while prioritizing the safety and security of everyone involved. By enhancing police visibility, implementing prompt response strategies, and actively monitoring real-time situations on the ground, we aimed to effectively manage any incidents that could potentially disrupt peace and security during Sinulog 2025 celebrations,” matod ni PBGen. Maranan.
Ang fluvial procession usa sa labing gipasidunggang kalihukan sa Sinulog Festival, nga nagapahiusa sa liboan ka mga deboto sa pagpasidungog sa Santo Niño. (Renante Socia Lada)
(Source: PRO7-PIO)