Tres suspechao el ya aresta y P1.3 millon valor de droga ilegal el ya confisca el mga autoridad na un campaña contra droga na ciudad de Zamboanga, asegun con el policia del Miercoles.
Si Police Brigadier General Bowenn Joey Masauding, el director del mando regional del policia o Police Regional Office-9 (PRO-9), nohay mas nombra con el tres arestao suspechao puera lang de habla’r todo sila mga hombre.
Asegun con Masauding, con el tres suspechao ya aresta durante un operacion de compra busto mga ala 1:08 del Lunes tarde na calle de Alejo Alvarez na Barangay Zone 1, ciudad de Zamboanga.
Asegun con Masauding, el mga operativas ya confisca na posesion del mga arestao suspechao 200 gramos de suspechao shabu enpaquetao na cuatro termosellada transparente sobrecitos plastico con el valor de P1,360,000, un balutan de 49 pedaso de paltik P1,000 que ya usa como boodle money que ya pone insima real P1,000 ya usa como markao dinero.
El mga confiscao evidencia ya lleva na Regional Forensic Unit para el propio examinacion y con el mga arestao suspechao ya detene na quartel del to Zamboanga City Police Office para el propio disposicion.
Si Masauding ya alabla con el mga operativas del Regional Drug Enforcement Unit-9 por el exitoso operacion de compra busto na ciudad de Zamboanga que ya resulta na aresto del tres suspechao y confiscacion de P1.3 millon valor de droga ilegal. (B. Garcia)