El mga autoridad ya aresta na un operacion de aplicacion de ley con el un persona mas buscada na Bangsamoro Autonomous Region in Muslim Mindanao (BARMM), asegun con el policia del Miercoles.
Si Police Colonel Robert Daculan, el director del policia na provincia del Lanao del Sur, ya nombra lang con el arestao persona mas buscada como si alias Papi, un residente de Barangay Piagoay-Pimbataan na municipio de Tubaran.
Asegun con Daculan, con Papi ya aresta na un operacion de aplicacion de ley por medio de implementacion de orden de aresto mga alas 7:55 del Lunes denoche na Barangay Poblacion, Tubaran, Lanao del Sur.
Asegun con Daculan, si Papi tiene pendiente orden de aresto por el crimen de matansa sin recomendao piansa que ya dale el un corte na ciudad de Marawi, Lanao del Sur, del Mayo 27, 2022.
Si Daculan ya habla, si Papi ta enfrenta tamen otro asunto por ilegal posesion de armas de fuego y bala que ya dale el corte na ciudad de Marawi, Lanao del Sur, del Julio 15, 2024.
Asegun con Daculan, ya confisca na posesion de Papi un calibre .45 pistola con clip y mga bala.
Asegun con Daculan, puera que listao si Papi como el numero siete persona mas buscada na BARMM, clasificao tamen ele como el numero cuatro persona mas buscada na provincia del Lanao del Sur y numero dos persona mas buscada na municipio de Tubaran, Lanao del Sur.
Si Daculan ya habla, con Papi ya pone bajo’l custodia del Criminal Investigation and Detection Group na provincia del Lanao del Sur para el propio documentacion y disposicion. (B. Garcia)