El mga autoridad ya aresta dos personas y ya confisca P2.8 millones valor e smuggled cigarillo na provincia del Zamboanga del Sur, asegun con el policia del Miercoles.
El policia nohay identifica con el dos arestao personas con quien ya aresta mga alas 4:42 del Martes aga na mar del Barangay Mama, Dumalinao, Zamboanga del Sur.
Asegun con el policia, el mga personajes del Zamboanga del Sur Maritime Police Station (ZDS MARPSTA) en coordinacion con el Sub-Oficina de Buro de Aduana na ciudad de Pagadian, ta conduci patrulla maritima cuando ya columbra sila con un banca de motor.
Asegun con el policia, ya descubri el mga autoridad cay el banca de motor ta carga 50 cajon de cigarillo que tiene el valor del P2.8 millones.
Asegun con el policia, el mga personajes del ZDS MARPSTA, ya aresta con el dos personas y confisca con el mga cigarillo despues que ya falla sila presenta el necesario documentos del de ila cargamento.
El policia ya habla, ya detene con el dos arestao personas y con el confiscao 50 cajon de cigarillo y el banca de motor ya entrega na custodia del Buro de Aduana para el propio disposicion.
El policia ya habla, el dos arestao personas hay enfrenta el asunto por violacion del Ley de Republica 10863, o mas conocido como el Customs Modernization and Tariff Act del 2016 y Ley de Republica 10643 conocido como el Ley de Advertencias Sanitarias Graficas. (B. Garcia)