Un persona el ya aresta y valor de P241,500 contrabando el ya confisca el mga autoridad na mar del provincia de Tawi-Tawi, asegun con el policia del Lunes.
El 1st Special Operations Unit (1SOU) del Philippine National Police-Maritime Group (PNP-MG), nohay mas nombra con el arestao persona puera de habla’r cay un 43 años ele y un residente del municipio de Sitangkai, Tawi-Tawi.
Asegun con el 1SOU, con el persona ya aresta del Sabado denoche na mar del Barangay Lagasan, Bongao, el capital del provincia de Tawi-Tawi.
El mga personajes del 1SOU ta conduci patrulla maritima cuando ya columbra sila con un banca motorizada ta navega para na canto’y aplaya del Barangay Lagasan.
Durante el inspeccion, el mga personajes del 1SOU ya descrubri cay el banca motirizada ya transporta 18 cajon de diferentes clase de smuggled cigarillo que tiene el valor de P241,500.
Con el mga confiscao cigarillo hay entrega na Buro de Aduana para el propio disposicion. (B. Garcia)