El mga autoridad ya aresta un persona y ya confisca P68,000 valor de droga ilegal na un operacion contra droga na provincia del Lanao del Sur, asegun con el policia del Domingo.
Si Police Colonel Robert Daculan, el director del policia na provincia del Lanao del Sur, nohay nombra con el arestao suspechao, quien un residente de Barangay Muslim village, Wao.
Asegun con Daculan, con el suspechao ya aresta na un operacion de compra busto mga alas 7:10 del Viernes denoche na Purok 2, Barangay Eastern, Wao, Lanao del Sur.
Asegun con Daculan, ya confisca na posesion del suspechao 10 gramos de shabu enpaquetao na un termosellada transparente plastico sobrecito que tiene el valor de P68,000, y dinero de compra busto.
Si Daculan ya habla, con el mga confiscao shabu ya lleva na Regional Forensic Unit-Bangsamoro Autonomous Region para el examinacion y con el arestao suspechao ya detene na cuartel del policia na municipio del Wao para el propio disposicion. (B. Garcia)