El mga autoridad ya aresta un individual de alto valor, o HVI, y ya confisca valor de P340,000 droga ilegal na un operacion contra droga na ciudad de Zamboanga, asegun con el policia del Lunes.
El policia ya nombra con el arestao suspechao como si alias Marhamin, 39 años el edad y residente del Sitio Pitogo, Barangay Sinunuc, ciudad de Zamboanga.
Asegun con el policia, con Marhamin ya aresta na un operacion de compra busto mga alas 11:59 del Domingo aga na Sitio Bactus, Barangay Talabaan, ciudad de Zamboanga.
Asegun con el policia, ya confisca na posesion de Marhamin 50 gramos de duspechao shabu enpaquetao na un termosellada plastico sobrecito que tiene el valor de P340,000, un portamoneda, 59 falsificao P1,000 como ya usa como robar dinero que ya pone incima un real P1,000 como markao dinero, un bolso plastico, y un celpon.
Asegun con el policia, ya detene con el arestao suspechao na quartel del Zamboanga City Police Station 4 en preparacion para el plantada del asunto contra conele por violacion del Ley Integral de Drogas Peligrosas de 2002. (B. Garcia)