Tres personas el ya aresta mga autoridad despues que ya bungca sila con un “drug den” durante un campaña contra droga ilegal na region autonomo, el Philippine Drug Enforcement Agency-Bangsamoro Autonomous Region in Muslim Mindanao (PDEA-BARMM) ya anuncia del Lunes.
Asegun con el PDEA-BARMM, con el mga arestao suspechao ya conose como canda Jame Cyrill Curayay, 21 años el edad y el alegaomente drug maintainer; Michael John Dahili, 31; y si Datu Wahid Panabal.
Asegun con el PDEA-BARMM, con el mga suspechao ya aresta na un “buy-bust operation” na Purok Masagana, Barangay Rosary Heights 10, ciudad del Cotabato del Sabado.
El PDEA-BARMM ya habla, ya puede recubri na bungcao drug den siete paquetes de suspechao shabu que tiene el pesades de sinco gramos con el valor de P34,000, diferente cosas para na uso de droga ilegal y markao sen.
El mga arestao suspechao detenido na carcel del PDEA-BARMM.
Asegun con el PDEA-BARMM, con el mga arestao suspechao ay planta el formal asunto por violacion del Comprehensive Dangerous Drugs Act of 2002. El drug den na ciudad de Cotabato amo el segundo que ya bungca el PDEA-BARMM na region autonomo.
El primero drug den ya bungca na Barangay Latih, Patikul, Sulu del Noviembre 15 que ya resulta na aresto de cuatro personas envuelto na uso de droga ilegal. (B. Garcia, photo courtesy of PDEA-BARMM)