Un notorioso criminal el ya muri mientras dos pulis ya iri na un tirahan durante el operacion de aplicacion de ley na provincia del Lanao del Sur, asegun con el policia na region autonomo.
El Police Regional Office-Bangsamoro Autonomous Region (PRO-BAR) ya reporta cay el tirahan ya ocuri na Barangay Bagoaingod na municipio de Ganasi, Lanao del Sur del Sabado.
El PRO-BAR ya nombra con el muerto notorioso criminal como si Alias Lastikman, quien ta enfrenta el asunto de cuatro cuentas de matansa, tres cuentas āfrustrated murderā, y āattempted murderā.
El corespondiente orden de aresto sin recomendao piansa ya dale contra con Lastikman el tribunal del Lanao del Norte del Enero 14, 2021.
El mga pulis y soldao ta aproxima na residencia de Lastikman para sirvi orden de aresto cuando ya tira el suspechao que ya resulta na tirahan donde dos pulis el ya iri.
Asegun con el PRO-BAR, con Lastikman, quien ya iri durante del tirahan ya lleva na hospital pero ya declara conele muerto el doctor.
El dos irido pulis, quien mga personajes del Special Action Forces (SAF), ta esta na estable el condicion.
El uno del dos irido pulis esperansao man de alta mientras el otro ay esta pa bajo el operacion.
El mga autoridad ya recubri un riple Armalite y mga bala na residencia del Lastikman, asegun con el policia.
Si Police Brigadier General Allan Nobleza, el PRO-BAR director, ya comenda con el mga operativas de pulis y militar por el buen resulta del coordinao operacion.
Si Nobleza ya apela con el publico para ayuda con el autoridad na buscada con mga criminal y reporta si tiene mga pusil sin licensia na de ila comunidad que ay privine usa na futuro actividad ilegal. (B. Garcia, photo courtesy of PRO-BAR)