El mga autoridad ya aresta con un mecanico y ya confisca P680,000 valor de droga ilegal na un operacion contra droga na ciudad de Zamboanga, asegun con el Philippine Drug Enforcement Agency (PDEA) del Jueves.
Si Maharani Gadaoni-Tosoc, el director regional del PDEA, ya identifica con el arestao mecanico como si Christian Dave Peralta, 24 años el edad y residente de Barangay Tetuan, ciudad de Zamboanga.
Asegun con Gadaoni-Tosoc, con Peralta ya aresta na un operacion de compra busto mga alas 12:20 del Martes tarde na Zone 2, Barangay Boalan, ciudad de Zamboanga.
Asegun con Gadaoni-Tosoc, ya confisca na posesion de Peralta 100 gramos de suspechao shabu enpaquetao na dos termosellada transparente sobrecitos plastico con el estimao valor de P680,000, un motorciclo, un celpon, un bolsa de sinturon, un bolsa de basura, y dinero de compra busto.
Si Gadaoni-Tosoc ya habla, con Peralta hay planta sila el caso por violacion del Seccion 5, Articulo 2, del Ley de Republica 9165, nombrao tamen como el Ley Integral de Drogas Peligrosas de 2002.
Si Gadaoni-Tosoc ya habla, el operacion de compra busto ya conduci contra con Peralta el mga agentes del PDEA con el suporta del policia. (B. Garcia)