El mga agentes del Philippine Drug Enforcement Agency (PDEA) ya aresta un chufer de triciclo y ya confisca valor de P1.3 millones droga ilegal na un operacion contra droga na ciudad de Zamboanga, asegun con un alto oficial del PDEA del Miercoles.
Si Maharani Gadaoni-Tosoc, el director del PDEA-Zamboanga Peninsula, ya identifica con el arestao chufer como si Ronald Doble, 45, años el edad y residente Barangay Mampang, ciudad de Zamboanga.
Asegun con Gadaoni-Tosoc, con Doble ya aresta mga alas 11:43 del Martes aga na calle Villalobos, Barangay Zone 4, ciudad de Zamboanga.
Si Gadaoni-Tosoc ya habla, con Doble ya aresta despues que ya vende 50 gramos de suspechao shabu enpaquetao na un termosellada transparente plastico sobrecito que tiene el valor de P340,000 con un secreta del PDEA.
Asegun con Gadaoni-Tosoc, durante el aresto Doble, ya puede tamen recubri na su posesion otro tres sobrecitos plastico ta contene 150 gramos de suspechao shabu con el valor de P1.02 millones, llevando el total confiscao droga ilegal na P1,350,000.
Asegun con Gadaoni-Tosoc, ya puede tamen recubri na posesion de Doble un balutan de P1,000 robar dinero que ya pone encima un real P500 markao dinero, un triciclo, y un bolso plastico.
Asegun con Gadaoni-Tosoc, ya detene con Doble en preparacion para el plantada del caso por violacion del Secciones 5 y 11,Articulo 2 del Ley de Republica 9165, o mas conocico como el Ley Integral de Drogas Peligrosas de 2002. (B. Garcia)