El Philippine Drug Enforcement Agency (PDEA), por medio del de ila “Isumbong Mo sa PDEA Facebook Page”, ya puede aresta un “target-listed” personalidad de droga na provincia del Zamboanga del Norte, asegun con el agencia del Lunes.
El oficina regional del PDEA ya identifica con el arestao target-listed suspechao como si Arnel Lagata Alpa, 36, años el edad y sin empleyo.
Asegun con el PDEA, con Alpa ya aresta na un operacion de compra busto mga alas 8:20 del Jueves denoche na Purok Cacao, Barangay Minaog, Ciudad de Dipolog, Zamboanga del Norte.
El PDEA ya habla, ya confisca na posesion de Alpa un gramo de suspechao shabu enpaquetao na dos termosellada transparente plastico sobrecitos que tiene el valor de P6,800, un envoltorio de dulce, celpon, y dinero de compra busto.
Asegun con el PDEA, ya detene con el arestao suspechao y hay enfrenta le el caso por violacion del Secciones 5 y 11, Articulo 2 de Ley de Republica 9165 o el Ley Integral de Drogas Peligrosas de 2002.
El PDEA ya implementa con el Isumbong Mo sa PDEA Facebook Page como uno del tactica del agencia na campaña contra droga ilegal na region. (B. Garcia)