Gi-awhag sa Philippine Health Insurance Corporation (PhilHealth) Region 7 ang publiko nga magamit ang gipalbo nga Konsultasyong Sulit at Tama (Konsulta) package gikan sa mga accredited Konsulta Package Providers (KPP).
Ang Konsulta package gipalapdan aron maghatag og komprehensibong primary healthcare alang sa mga Pilipino. Kini nga programa nagtinguha nga mapakunhod ang pinansyal nga kabug aton sa healthcare pinaagi sa paghatag og libre nga mga kinahanglanon nga serbisyo medikal.
Mga serbisyo nga sakop sa Konsulta package:
1. Preventive care – Pagmonitor sa kahimsog ug paglikay sa mga sakit pinaagi sa regular nga check-up.
2. Laboratory tests – Pagkuha og libre nga basic laboratory tests sama sa CBC, urinalysis, ug fasting blood sugar.
3. Essential medicines – Paghatag og libre nga medisina alang sa mga common nga kondisyon sama sa high blood pressure, diabetes, ug uban pa.
4. Health risk assessment – Pagtuki sa mga risgo sa panglawas ug pagtambag bahin sa preventive measures.
Sumala sa PhilHealth Region 7, ang Konsulta package gipahapsay aron ang mga miyembro makadawat dayon og serbisyo gikan sa mga accredited nga healthcare providers sa ilang dapit.
Ang mga interesado kinahanglan magparehistro sa usa ka Konsulta Provider pinaagi sa pagbisita sa PhilHealth offices o pinaagi sa online platforms nga gigamit sa ahensya.
Gidani sa PhilHealth ang tanan nga mga miyembro, ilabi na ang mga vulnerable sectors sama sa indigents ug senior citizens, nga magparehistro ug magamit ang maong benepisyo aron malikayan ang mas mahal nga gasto sa tambal ug ospitalisasyon.
Ang Konsulta package usa ka bahin sa panglantaw sa PhilHealth nga masiguro nga tanang Pilipino adunay access sa maayong healthcare services, subay sa tumong nga Universal Healthcare (UHC).
Para sa dugang impormasyon kabahin sa Konsulta package, ang publiko gidasig nga mobisita sa mga opisina sa PhilHealth o sa ilang opisyal nga website. (Renante Socia Lada)
(Source: PIA-7)