Un persona el arestao mientras otro uno el ya puede escapa y valor de P6.8 millon droga ilegal el ya confisca na un campaña contra droga na provincia del Zamboanga Sibugay.
Asegun con el Philippine Drug Enforcement Agency (PDEA) del Zamboanga Sibugay, con el arestao suspechao ya conose como si Ben Nadjar, 46 años el edad y residente del Sitio Kapok, Barangay Sawa, Mabuhay, Zamboanga Sibugay.
Un hombre compañero del arestao suspechao nombrao lang como un tal “Hadz” ya puede escapa, asegun con el PDEA.
El PDEA ya habla con Nadjar ya aresta na un campaña contra droga ilegal mga 11:16 del Miercoles aga na Purok Rizal, Barangay Poblacion, Imelda, Zamboanga Sibugay.
Asegun con el PDEA, ya confisca na posesion de Nadjar un kilo de suspechao shabu que tiene el valor de P6.8 millon, 11 balutan de “boodle money” que ya usa na compre del droga ilegal, un celpon, un portamoneda, P420 sen de diferente denominaciones, un bolsa de comida que ya usa como envase del articulo del “buy-bust” y bolsa ecologio que ya usa como envase del boodle money.
El PDEA ya habla el campaña contra con el suspechao ya conduci con el suporta del militar y policia.
Asegun con el PDEA, con el arestao suspechao ya detene en preparacion para el plantada del formal asunto por violacion del Comprehensive Dangerous Drugs Act of 2002” contra conele. (B. Garcia, photo courtesy of PDEA-Zamboanga Sibugay)