Total de 20 armas de fuego de alta calibre, incluido un masingan, el ya rindi el mga oficiales de barangay del ciudad de Isabela na 101st Infantry Brigade y gobierno provincial del Basilan.
El rindida del mga pusil sin licensia ya ase possible por medio del programa de “Small Arms and Light Weapons (SALW)” que ya complementa el programa del “Assistance for Security, Peace, Integration and Recovery for Advancing Human Security (ASPIRE)”.
Si Colonel Bernard Samin, el comandante del 4th Special Forces Battalion, ya presenta con el mga pusil con Brigadier Alvin Luzon, el comandante del 101st Infantry Brigade, y Gobernador Hadjiman Hataman-Salliman, despues que el mga concierne oficiales na encabesamiento de Señor Peter Eisma, el administrador del ciuda de Isabela, ya entrega con el mga pusil.
El formal programa de entrego del mga pusil ya conduci na quartel del 19th Special Forces Company na Barangay Tabuk, ciudad de Isabela, Basilan, del Jueves.
Si Eisma, quien ya representa con Alcalde Sitti Djalia Turabin-Hataman del ciudad de Isabela durante el programa, ya comenda con el esfuerzo del mga oficiales local por el de ila suporta na persistente esfuerzo del ciudad para sustene con el proceso de paz hinde lang na ciudad de Isabela, pero hasta del entero provincia del Basilan.
“El SALW hinde lang el solamente manera para rindi armas de fuego, sino para enseña tamen queda ciudadanos respetoso del ley y responsable dueño de pusil,” si Eisma ya habla.
Na su mensaje, si Luzon ya extende su apreciacion y felicidades con continuando suporta del mga jefe ejecutivos local y gobierno provincial para el implementacion exitosa del programas de SALW y ASPIRE que ta complementa con el campaña de seguridad na provincial. (B. Garcia, photo courtesy of 101st Infantry Brigade)