Dos suspechao el ya aresta y ya confisca valor de P1.7 millon droga ilegal el mga autoridad na un campaña contra droga na Bangsamoro Autonomous Region in Muslim Mindanao (BARMM), asegun con el Philippine Drug Enforcement Agency (PDEA) del Martes.
Asegun con Gil Cesario Castro, el Director del PDEA-BARMM, con el dos arestao suspechao ya conose como canda Nungga Abdila alias Nungga Mamalad Abatingga, 32, y si Amir Usman, 31 años el edad.
Asegun con Castro, con el dos suspechao quien clasificao como mga objetivos de alto valor o “high-value targets (HVTs)”, ya aresta na un “buy-bust operation” na camino general na Barangay Makir, Datu Odin Sinsuat, Maguindanao del Norte, del Lunes.
Si Castro ya habla, ya confisca na posesion de canda Abdila y Usman 250 gramos de suspechao shabu enpaquetao na sinco transparente plastico sobrecitos que tiene el valor de P1.7 millon, un celpon, compra busta dinero, un motorciclo, y tarjeta de identificacion.
Asegun con castro, ya detene con el dos arestao suspechao na carcel del PDEA-BARMM en preparacion para el plantada del asunto contra canila por violacion del “Comprehensive Dangerous Drugs Act of 2002.”
Asegun con Castro, el dos arestao suspechao envuelto na distribucion y vendida de droga ilegal na diferente municipios na Maguindanao, Ciudad de Cotabato y hasta na Ciudad de General Santos.
Si Castro ya habla, el aresto del dos suspechao ay tene significante impacto na distribucion y vendida de droga ilegal na region autonomo y ng mga sercanos provincias y ciudad.
Si Castro ya habla, con el dos suspechao ya aresta con el suporta del policia.
(B. Garcia)
