Ya ausilla mga personajes del “Philippine Coast Guard (PCG)” con un barko de pasajero que ya keda malo myentras ta navega desde’l ciudad de Zamboanga para na provincia de Tawi-Tawi.
Asegun con el PCG cay el barko nombrao como el “M/V Trisha Kerstin 2” ya man aberiya el makina myentras ta navega na vicinidad del isla de Baluk-Baluk na municipio del Hadji Muhtamad, Basilan, mga alas 2 del Sabado Aga.
Asegun na investigacion cay ya el causa del aberiya amo ya kebra el “main engine cooling pipe” del makina del barko.
El barko que ya man aberiya ta carga akel tiempo total de 342 pasajeros.
Asegun con el PCG cay enseguidas mga personajes del “Coast Guard Sub-Station Hadji Muhtamad” ya ausilla y ya guardia con el barko myentras ta compone mga tripulantes con el makina del “M/V Trisha Kertin 2”.
Ya continua navega el “M/V Trisha Kerstin 2” para na provincia de Tawi-Tawi cuando ya puede compone mga tripulante con el makina del barko.
El barko esperansao llega Domingo denoche na su final destinacion. (B. Garcia, photo courtesy of Hadji Muhtamad Coast Guard Sub-Station)