Un “High Value Target (HVT)” suspechao el ya aresta mga otoridad myentras P6.8 milyones valor de suspechao shabu ya confisca na un campanya contra droga ilegal na provincial del Zamboanga Sibugay.
Con el arestao HVT suspechao ya conose como si Bennajar Akok alias Khalid, asegun con Jury Rocamora, el hefe del “Philippine Drug Enforcement Agency (PDEA)-Zamboanga Sibugay Provincial Office”.
Asegun con Rocamora con Akok ya aresta na un “buy-bust operation” mga alas 5:40 del tarde del Sabado el combinao fuersa del PDEA y pulisiya na Purok Sampaguita, Barangay Surabay, R.T. Lim, Zamboanga Sibugay.
Pero asegun con Rocamora cay el dos compañeros de Akok ya puede escapa. Canila dos ya conose como si Aisa Akok and un tal Markhan.
Asegun con Rocamora ya puede recubri na posesion de Akok mas o menos un kilo de suspechao shabu con el valor de P6.8 milyones, 12 bundel de P1,000 “boodle money” que ya pone insima un verdadero P1,000 como markao sen, un cellpon, un negro celopen, un negro portamoneda, y un bag de “green tea.”
Si Rocamora ya habla cay ay planta asunto contra con el mga suspechao, incluwido el dos ya puede escapa, por violacion del Seccion 5, Articulo II del “Republic Act 9165” o mas conosido como el “Comprehensive Dangerous Drugs Act of 2002. (B. Garcia, photo courtesy of PDEA-Zamboanga Sibugay Provincial Office)