Segseggaan dagiti mannalon iti probinsia ti Ilocos Norte ti operasion ti tomato cold storage facility tapno makatulong a mangkissay iti lugida kalpasan ti panagani gapu iti pannakadadael.
Pinunduan ti World Bank nga aggatad iti PHP38 milion iti babaen ti Philippine Rural Development Project (PRDP) ti Department of Agriculture (DA), maibangon ti pasilidad nga imanehar ti San Joaquin Multi-purpose Cooperative iti Barangay 1 San Joaquin iti likud ti gasolinahan ti Sarrat.
Apaman a malpas, kinuna ni Lucresia Ver, bise chair ti San Joaquin Multi-purpose Cooperative, a ti pasilidad ket makagunggona kadagiti lokal a managmula iti kamatis.
Ti proyekto ket matmatan a malpas iti uneg daytoy a tawen kalpasan ti ground-breaking ceremony inton miyerkules.
Karaman ti kamatis kadagiti nangato ti pategna nga apit ti Ilocos Norte nga addaan iti nakasagana a merkado ngem iti pannakaserra ti Northern Foods Corporation (NFC) a makiramraman iti panagpataud iti tomato paste iti Amianan a Luzon, adu dagiti agmulmula iti kontrata a nagturong iti sabali nga apit.
Ilocos Region ti mangsupsuplay idi iti agarup 13 a porsiento iti 30,000 a metriko tonelada ti tinawen a konsumo ti pagilian iti tomato paste.
Agarup 3,000 a managmula iti kamatis ti nag-shift iti dadduma pay a nangato ti pategna nga apit kalpasan ti pannakaserra.
Imbilin ni dati a Presidente Rodrigo Roa Duterte ti pannakaikkat ti NFC gapu ta saanen a nagserbi iti panggepna a maitunos iti national development policy, a nangted iti dalan iti pribatisasion ti kompania.
Ngem ti gobierno ti Ilocos Norte, iti pannakitinnulong ti DA, ket kidkiddawen dagiti investors nga i-reactivate ti tomato processing plant iti babaen ti baro a management.
Maiparparegta dagiti agmulmula iti pagay ditoy nga ag-shift kadagiti high-value crops kas iti kamatis bayat nga agtultuloy ti panangtulong ti gobierno kadakuada babaen ti panangipaayna iti nadumaduma nga agricultural inputs, ken panagproseso ken panagtunos iti merkado dagiti produktoda. (April joyce Gonzales)
(Source: Department of Agriculture)