Un personaje del Fuersa Marino ya iri na accidente vehicular na carretera nacional na provincia del Zamboanga Sibugay.
Si Police Colonel Eduard Mallo, el director del pulisiya na provincia del Zamboanga Sibugay, ya nombra con el victima como si PFC Ariel Borda, 26 años el edad y designao na “Marine Battalion Landing Team-1” base na Tawi-Tawi.
Asegun con Mallo cay el accidente vehicular ya ocuri mga alas 7:10 Domingo denoche na carretera nacional na Barangay Timuay Danda, Kabasalan, Zamboanga Sibugay.
Asegun con Mallo, base na investigacion, ya tumba si Borda na camino despues que ya man bangga ele na costao del un “fuel tanker” myentras ya precura el soldao marino man una con el trak na carretera nacional.
Ambos si Borda y si Ramil Romero, 37 años el edad, el chuffer del fuel tanker, ta viaja na igual direccion desde Barangay Poblacion, Kabasalan para na municipio de Siay, Zamboanga Sibugay cuando ya ocuri el accidente.
Ya lleba con Borda para na Path Finder Estate Hospital na Barangay Lumbayao, Kabasalan, para el curada medical. (B. Garcia)