Ya aresta con cuatro suspechao y ya confisca P469,200 valor de droga ilegal despues que ya bunka con un “drug den” el mga otoridad na dos separao campanya contra droga ilegal na Zamboanga Peninsula.
Asegun con Jury Rocamora, el hefe del Philippine Drug Enforcement Agency (PDEA) na provincia del Zamboanga Sibugay, con el tres del cuatro suspechao ya aresta mga alas 3:20 del Sabado tarde cuando ya bungka sila un “drug den” na Barangay Bangkerohan na municipio de Ipil.
Si Rocamora ya nombra con el tres arestao suspechao como canda Saidamin Bakara Casim alias Damin Cammah, 35; Abubakar Along Taning, 43; y si Ajimar Almedalla Idjol, 24 años el edad.
Aegun con Rocamora ya puede recubri na drug den 19 gramos de suspechao shabu con el valor de P129,200, un celpon, y otros mga cosas na uso de droga ilegal.
Con el aka-cuatro suspechao, si Warky Malla Assan, 42, ya aresta mga alas 11:35 del Biyernes tarde na Purok 1, Barangay Malagutay, aqui na ciudad de Zamboanga.
Asegun con el mando rehyonal del pulisiya ya puede recubri na posesion de Assan 50 gramos de suspechao shabu con el valor de P340,000, un bandel de P91,000 “boodle money” que ya pone insima un verdadero markao P1,000 y un pitaka.
El mga suspechao detenido pendiente el plantada del asunto encontra canila por violacion del “Comprehensive Dangerous Drugs Act of 2002”. (B. Garcia, photo courtesy of PDEA- Zamboanga Sibugay)