Dos personas, incluwido un oficial del barrio, el ya muri myentras otro dos el ya iri na un incidente de tiroteo aqui na ciudad del Zamboanga.
Asegun con Police Colonel Alexander Lorenzo, el Zamboanga City Police Office (ZCPO) director, el incidente ya ocuri mga alas 8:12 del Domingo denoche na camino del Labuan, Barangay San Jose Gusu, este ciudad.
Si Lorenzo ya nombra con el dos muerto victima como canda Jamar Anjawang, 50, y si Jul-Asmad Anjawang, 56. Si Jamar un antes kagawad na Barangay Pamansaan, Mabuhay, Zamboanga Sibugay, myentras si Jul-Asmad amo el presente barrio capitan del Pamansaan.
Asegun con Lorenzo con Jamar ya declara muerto el doctor cuando ya llega na ospital myentras si Jul-Asmad ya despidi myentras bajo el curada medical.
Si Lorenzo ya nombra con el mga irido victima como canda Ibrahim Nasta, 38, y si Habir Nasta, 46 años el edad, quien un candidato para barangay kagawad na Pamansaan, Mabuhay.
Base na investigacion, cay con Jul-Asmad ya tira el uno del dos armao personas despues que ya abaja le na vehiculo que ya para enfrente de un establisimiento de negocio na Barangay San Jose Gusu.
El otro suspechao ya atraca lao del chuffer del vehiculo donde ya abaja si Jul-Asmad y ya tira con Jamar, Ibrahim y Habir.
Despues que ya tira con el mga victima, el dos suspechao ya munta na un coche que ya enderesa para na pueblo.
Asegun con Lorenzo ya pueda aresta con el uno del dos suspechao na un “follow-up operation” mga ala una del Lunes madrogada na Calle Comet, Barangay Tumaga, en este ciudad.
Si Lorenzo ya nombra con el arestao suspechao como si Police Staff Sergeant Brazir Hamid, 37 años el edad y un myembro del City Traffic Enforcement Unit del ZCPO.
Con Hamid ya detene na quartel del ZCPO pendiente el plantada del formal asunto criminal encontra conele.
Si Lorenzo ya habla cay tiene total de 13 personas, incluwido mga victima, el muntao na vehiculo durante el incidente. (B. Garcia, photo courtesy of Zamboanga City Police Station 11)