El Department of Social Welfare and Development (DSWD) ya distribuji catorse punto tres milyon de pesos ayuda para el studio del cuatro mil nueve sientos treynta’y dos estudiantes del Sabado aqui na Rehyon Nueve.
Aquellos quein ya recivi con el ayuda del Sabado amo ya el terser grupo de recipientes del programa del ayuda de educacion del DSWD.
El DSWD esperansao completa con el distribucion del ayuda de educacion na Septiembre veinte cuatro. El distribucion del ayuda ya principia del Agosto 20.
Asegun con el detalyes ya dale el DSWD cay mil cuatro sientos ochenta’y dos del cuatro mil nueve sientos treynta’s dos beneficiaryo ya recivi ayuda financial amo maga estudiantes de aqui na ciudad de Zamboanga.
El losdemas maga beneficiaryo amo maga estudiantes del Ipil, Zamboanga Sibugay; Liloy, Zamboanga del Norte; Dipolog City, Zamboanga del Norte; Pagadian City, Zamboanga del Sur; y ciudad de Isabela, Basilan.
El cuatro mil nueve sientos treynta’y dos recipientes compuesto del maga siguinetes: collegio, dos mil quinientos setenta’y siete; escuela secundaria superior (senior high school), quinientos veinte seis; secundarya, seis sientos treynta’y cuatro; y elementarya, mil siento noventa’y sinco.
Base na programa del DSWD, cada un estudiante de elementarya ay recivi mil peso; secundarya, dos mil pesos, escuela secundarya superior, tres mil pesos; y colegio o vocational, cuatro mil pesos. (Bong Garcia, Jr.) (Photo Courtesy of DSWD IX)