El fuersa del armada del Pilipinas ya pone bajo con el 4th Marine Brigade y Marine Battalion Landing Team-8 na mando del Northern Luzon Command para ase fuerte del guardiada na borde na rehyon de Luzon del pais.
Este ya bene despues que el 4th Marine Brigade y MBLT-8 ya rindi buen servicio por seis años na combate contra terorismo na provincia de Sulu.
Durante el ceremonia de despidida del Sabado, el Tiniente Heneral Alfredo Rosario, Hijo, el comandante del Western Mindanao Command, ya dale reconosimiento con el 4th Marine Brigade y MBLT-8 na un ceremonya que ya ase na quartel del mando na Barangay Tandu-Bato, Luuk, Sulu.
El fuersa naval na weste Mindanao ya presenta tamen el Plaque de Merito y ya honra con el maga personajes del 4th Marine Brigade y MBLT-8.
Si Rosario ya comenda canila por el del ila inestimable contribucion na paz y desarollo del Sulu.
El 4th Marine Brigade conosido antes como el Philippine Marine Ready Force (PMRF), antes que ya queda este como un probationary marine brigade del Junio año dos mil deci-nueve para ayuda na peleya contra con el bandido Abu Sayyaf.
Myentras tanto, si Rosario ya habla cay el MBLT-7 esperansao ay omenta con el fuersa del Joint Task Force Tawi-Tawi o Joint Task Force Central, dos del maga mando bajo del Westmincom. (Bong Garcia, Jr.) (Photo Courtesy of the Joint Task Force-Sulu)