Un official y siete mga personajes del 15th Civil-Military Operations Battalion (CMO Bn) base na provincial del Basilan el ya promociona el Philippine Army para na mas alto ranggo.
El official que ya promociona para na ranggo de capitan amo si Primer Tiniente Jan Lemrolf Francisco del 15CMO Bn.
El militar nohay mas nombra con el siete nuevo promocionao personajes del 15CMO Bn.
El ceremonia na ponida del nuevo insignia ya hace del Lunes aga na quartel del 101st Infantry Brigade na Barangay Tabiawan, ciudad de Isabela, provincia de Basilan.
Con el ceremonia ya encabesa si Brigadier General Alvin Luzon, el comandante del 101st Infantry Brigade.
Na su mensaje, si Luzon ya habla cay el promocionada hinde lang ta refleja mas alto poder pero viene tambien un gran responsibilidad.
Con el ceremonia ya atende tamen si Tiniente Coronel Noli Binbinon, el comandante del 15CMO Bn.
Demas temprano, si Luzon y Binbinon ya discuti para mejora con el actividades de CMO para suporta con el esfuerzo de desrollo del gobierno provincial del Basilan y eradica terorismo y influencia del mga mal elementos na sociedad. (B. Garcia)