Ya muri el un oficial de gobierno na un incidente de tiroteo que ya ocuri na ciudad de Zamboanga amediante el implementacion del prohibicion de armas de fuego el el elecciones, asegun con el policia del Viernes.
Si Police Lieutenant Colonel Paul Andrew Cortez, el portavos del Zamboanga City Police Office (ZCPO), ya identifica con el fatalidad como si Jaybee Robert Baguinda, 57 años el edad y el director del Registry Of Deeds (ROD).
Asegun con Cortez, el incidente ya ocuri mga alas 10:20 del Viernes aga na puerta del oficina del ROD na calle Rizal, Barangay Zone 4, ciudad de Zamboanga.
Asegun con Cortez, base na investigacion si Baguinda ta maneja su vehiculo pa entrada na compound del ROD cuando ya tira conele fatalmente el un desconocio armao persona.
Con Baguinda ya lleva na hospital, pero asegun con Dr. Shadrina Sarapuddin, el portavoz del Zamboanga City Medical Center (ZCMC), ya rebenta el resuello del oficial mga alas 11:28 del aga mientras bajo el curada medical.
Asegun con Cortez, el desconocio armao persona ya munta na un esperando motorciclo que ya corre para na direccion del calle Dr. Evangelista na Barangay Sta. Catalina.
El ZCPO ta revisa ahora con el mga imagenes del camera de television de circuito cerrado y ta colecta evidencia para identifica con el mga suspechao. (B. Garcia)