El Fuerza Naval ya designa y ya pone bajo mando y control del Naval Forces Western Mindanao (NFWM) con el un patrullero costero para fortalece el defensa matitima na sur Pilipinas, asegun con el militar del Domingo.
Asegun con el NFWM, el llegada del Jueves del BRP-Juan Magluyan (PC-392), un patrullero costero de clase Jose Andrada, ya marka un significante ocasion para del mando cay ta mejora este con el capacidad de flota para enfrenta con mga desafios de seguridad maritima regional.
El ceremonia formal de bienvenida ya conduci na pantalan del Ensign Majini na Estacion Naval Romulo Espaldon que ta servi como el quartel del NFWM na Calarian, ciudad de Zamboanga.
Na su mensaje, Si Coronel Jonathan Gabor, el diputado comandante del NFWM para operaciones marino, ya enfatiza el naturaleza cambiante de amenazos na region, notando cay este mga desafios ta extende ahora mas de guerra tradicional que ta inclui no-tradicional amenazos como de pirateria, trafico humano, contrabando, y terorismo.
Si Gabor ya recivi con el PC-392 en calor de Rear Admiral Francisco Tagamolila, Jr., el comandante del NFWM.
Antes su designacion na NFWM, el PC-392 ya esta bajo el Dry Docking and Other Related Repairs (DDORR) na Josefa Slipways Incorporated na ciudad de Navotas.
El designacion del PC-392 ta servi un claro testamento del liderato del Fuerza Naval concentra na seguridad na agua terorital del pais y asegura el seguridad del mga Filipino. (B. Garcia)