Nohay pasa nada con el un official de eleccion na provincia de Sulu mientras irido su hermano mayor na un incidente de tiroteo del Sabado na ciudad de Zamboanga, asegun con el policia.
El policia local ya identifica con el victima como si Nasser Amil Asiri, 57 años el edad y el hermano mayor del Abogao Vidzfar Amil Julie, 51, el supervisor de eleccion na provincia del Sulu, con quien nohay pasa nada.
El policia ya habla, el incidente ya socede mga alas 10:30 del Saturday aga na Villa Sta. Maria, Barangay Sta. Maria, ciudad de Zamboanga.
Asegun con Julie, estaba sila na Aeropuerto Internacional del Zamboanga y de camino pa bolbida na de ila residencia cuando uno del dos personas muntao na un motorciclo, que ya anda serca na de ila vehiculo, ya ripika de tiro canila.
Si Asiri ya anda encontra con Julie na aeropuerto siendo el official de eleccion nuevo ya llega desde Jolo, Sulu. Muntao sila dos na Sports Utility Vehicle (SUV) durante el incidente.
“Sabe yo, iyo el objetivo del mga armao personas,” si Julie ya habla na un entrevista, sugiriendo el incidente relatao na su trabajo.
Si Julie el ta maneja con el SUV y su hermano sintao na silla del pasajero durante el incidente.
El Zamboanga City Police Office ta conduci enbuenamente investigacion para determina el motivo y tambien establisa el identitificacion del mga suspechao responsable na incidente. (B. Garcia)