El Naval Forces Western Mindanao (NFWM) ta continua extende suporta con el Holy Trinity House, Foundation na Barangay Pasonanca, en este ciudad.
Si Rear Admiral Donn Anthony Miraflor, el comandante del NFWM, ya anuncia del Lunes cay en colaboracion con el J-Sayang Enterprises, ya dona sila mga comida esenciales na Holy Trinity House, Foundation del Biyernes.
El Holy Trinity House, Foundation ya sirvi como lugar donde puede esta mga orpano y otro vulnerable mga bata de aqui na ciudad y de sercanos lugar.
Asegun con Miraflor cay el mga comida ya dona sila ta incluwi mga saco de aros y diferente clase de enpaketao comida que ta necesita mga orpano ta esta na Holy Trinity House, Foundation.
Si Miraflor ya habla cay el acto de donar mga comida esenciales ta significa mas de ofresimiento material cay ta dale este esperansa, caridad, y un verdadero concierne o amor con mga bata.
Ademas, el mga personajes del fuersa naval aqui na weste Mindanao ya tene tamen oportunidad uni y conecta con el mga bata por medio de musica.
El esfuerso del NFWM y J-Sayang Enterprises ta dale mira cay comitido el fuersa naval aqui na weste Mindanao para dale alivio y suporta con el comunidad ta sirvi sila. (B. Garcia, photo courtesy of NFWM)