Monton de aspirantes para el eleccion del mga oficiales de barangay y Sangguniang Kabataan el ya enderesa na activity area del KCC Mall de Zamboanga para somete de ila certifico de candidatura.
Ese ya vene despues que ya principia ya el Commission on Elections (Comelec) accepta mga certifico de candidatura principiando este dia de Lunes, Agosto 28.
Asegun con el abogao Stephen Roy Cañete, el oficial de eleccion na primer distrito, cay el mga aspirantes puede somete de ila certifico de candidatura hasta na
Septiembre 2 alas 8 del aga hasta alas 5 del tarde.
Nohay habla si Cañete si cuanto mga aspirantes ya somete de ila certifico de candidatura del Lunes puera lang cay mayorparte de ila amo mga de lejanos barrio quein temprano pa ya anda ya na KCC Mall de Zamboanga.
Myentras tanto, si Cañete ya adverti con el mga aspirantes cay prohibido todo clase de campanya prohibido antes el periodo del campanya.
El campanya ay principia na Octubre 19 hasta Octubre 28. El dia de eleccion amo na Octubre 30.
Ya principia ya tamen impone con el prohibicion na llevada de armas de fuego (gun ban) principiando del media noche del Octubre 27. (B. Garcia, photo courtesy of City Hall PIO)