El Naval Forces Western Mindanao (NFWM) con el suporta del Mista Foundation USA ya construji tres “classrooms” na escuela de elementaria na municipio de Sibutu, Tawi-Tawi.
Asegun con el NFWM, el construccion del tres classrooms ya principia del Noviembre 14 y ya complete del Miercoles, Deciembre 6.
Asegun con el NFWM, el recipiente del tres nuevo classrooms amo el escuela de elementaria na Barangay Talisay, Sibutu, Tawi-Tawi.
El tres classroom puede acomoda 120 estudiantes de kinder y de segundo grado.
Con el nuevo construido classrooms ya entrega con el mga oficiales de educacion y del escuela de elementaria del Talisay del Miercoles si Commander Muksin Jasid, el hefe del civil-military operations del NFWM, por parte de Rear Admiral Don Anthony Miraflor, el comandante del NFWM.
El mga residentes del Barangay Talisay ya rindi de ila sincero gratitud con el NFWM y Mista Foundation USA por el construccion del tres nuevo classrooms na de ila lugar.
El Mista Foundation que ta encabesa si Reserve Commander Richard Gubatan, es un organizacion base na Estados Unidos. (B. Garcia, photo courtesy of NFWM)