Valor de P500,000 de diferente clase de cigarillo el ya confisca mga autoridad na campaña contra contrabando na ciudad de Cotabato, asegun con el policia del Sabado.
Asegun con Police Brigadier General Allan Nobleza, el Police Regional Office-Bangsamoro Autonomous Region (PRO-BAR) director, con el mga cigarillo ya confisca na Purok Palayan, Barangay Tamontaka 1, ciudad de Cotabato del Jueves.
Si Nobleza ya habla, el campaña contra contrabando ya conduci despues que ya recivi sila informacion cay tiene llegada mga cigarillo na Purok Palayan, Barangay Tamontaka 1.
Asegun con Nobleza, total de 17 cajon de diferente clase de cigarillo con el valor de P500,000 el ya confisca que ya abandona el mga suspechao “smugglers”.
Con el mga confiscao cigarillo ya ase el propio inventario y ya entrega na Buro de Aduana para el propio disposicion.
Si Nobleza ya adverti que ay persigi el policia planta asunto contra con mga smugglers que puede sila aresta.
Ta apela si Nobleza con el publico para no compra mga contrabando que ta vende na de ila comunidad. (B. Garcia, photo courtesy of PRO-BAR)