Un negociante el ya perde P2.1 millon cantidad de dinero con seis armao personas quien ya pretende como mga personajes del policia aqui na ciudad.
Asegun con el policia local el incidente ya ocuri mga alas 9:30 del Martes denoche na Paseo de Basilio, Calle Natividad, Barangay Tetuan, en este ciudad.
Asegun con el negociante con quien ya nombra el policia como si Al-Ghabid Abdul, 27 años el edad, y residente del Barangay Tetuan.
Base na investgiacion, el mga suspechao quien ya introduci como mga personajes del Philippine National Police Regional Special Operations Group (PNP-RSOG) ya entra na residencia de Abdul hablando cay sirvi sila un orden de aresto con Abdurajik Abdul alias Majarlika Abdul, el tata del negociante.
Despues de introduci de ila cuerpo, el dos del seis suspechao ya enderesa na segundo piso del casa y ya chekia todo’l posento y despues ya saca con el P200,000 na cajon del un mesa.
Ya saca tamen dos caja de yero el mga suspechao. El uno caja de yero ta contene P1,700,000 y el otro tiene laman P200,000.
El mga suspechao ya escapa abordo na un vehiculo color sinisao que tiene el numero de placa NDZ-3540.
El mga suspechao todo armao de riple, con bandolier y todo uniformao.
Mientras tanto, el Zamboanga City Police Station 6 ya ase el ondo investigacion para establisa el mga identificacion del mga suspechao. (B. Garcia)
