El pulisiya ya aresta con un negociante na companya contra droga ilegal na ciudad de Pagadian na provincia del Zamboanga del Sur.
Si Coronel Diomarie Albarico, el Zamboanga del Sur police director, ya nombra con el arestao negociante como si Roy Bantas, treynta’y nueve años el edad y residente de Purok Bagong Silang, Barangay Sta. Lucia, ciudad del Pagadian.
Asegun con Albarico cay con Bantas ya aresta na un buy-bust operation maga alas seis dies del Martes denoche na Purok Madasigon, Barangay Banale, ciudad de Pagadian.
Si Albarico ya habla cay ya puede confisca na posesion de Bantas suspechao shabu con el valor de dos mil nueve sientos noventa’y ocho pesos, un motorcyclo, y quinientos pesos markao sen.
Con el suspechao ya aresta maga personajes del Regional Drug Enforcement Unit-9 y maga pulis del ciudad de Pagadian.
El suspechao ta esta ahora bajo na custodiya del pulisiya del ciudad de Pagadian para el propio disposicion. (B. Garcia)