Con dos antes empleyados de un tienda de materiales de construccion quein tiene pendiente order de aresto el ya aresta maga pulis na provincia del Zamboanga del Sur.
Si Tiniente Benjie Tandayag, el official-en-cargao del Criminal Investigation and Detection Group (CIDG)-Zamboanga del Sur Provincial Field Office, ya nombra con el maga arestao personas como canda Rufa Mendez, sesenta años el edad y si Roger Bonggal, cuarenta años.
Asegun con Tandayag cay con Mendez ya aresta maga alas dies cuarenta’y seis del Lunes aga na Barangay Dao na ciudad de Pagadian, provincia del Zamboanga del Sur.
Si Tandayag ya habla cay si Mendez tiene pendiente orden de aresto por el asunto de robo calificado (qualified theft) con recomendao piansa de cuarenta mil pesos que ya dale el tribunal del ciudad de Zamboanga del Septiembre deci-seis año dos mil veinte dos.
Asegun con Tandayag cay el dueño del tienda de materiales de construccion ya acusa con Mendez por el asunto de robo calificado cay nohay ele entraga el entrada na bendida del maga rueda y batteriya.
Asegun con Tandayag, cay si Bonggal, igual como si Mendez, tiene tamen pendiente orden de aresto por el asunto de robo calificado con el piansa de cuarenta mil pesos ya dale el tribunal del ciudad de Zamboanga del Septiembre deci-seis año dos mil veinte dos.
Con Bonggal ya aresta maga alas onse uno del Lunes aga na Purok Lower, Barangay Mecolong, Dumalinao, Zamboanga del Sur.
Si Tandayag ya habla cay con Bonggal ya acusa el dueño del tienda de materiales de construccion alegaomente ya ruba con el bateriya y maga rueda del vehiculo del tienda que ya resulta na plantada del formal asunto na jusgado.
Ambos si Mendez y Bonggal bajo ahora na custodiya del CIDG-Zamboanga del Sur Provincial Field Office. (B. Garcia, photo courtesy of CIDG IX)