Human sa 20 ka-tuig nga pagretiro sa away, si Dinagat Islands Governor Nilo P. Demerey, Jr., usa ka Shisan (Master), misalmot nag usab sa gipahigayon nga Karatedo Championship sa Surigao City kalakip sa pagselebrar sa Bonok-bonok Festival niadtong ika-23 sa Oktubre, 2022, sa Provincial Gymnasium, Surigao City. Diin, ang atoang maabtik nga Gobernador nag 2nd placer sa maong aktibidad.
Si Governor Demerey, usa usab ka Shidan 7th Dan Blackbelt, ug giila nga “Deadly Dragon” misalmot sa maong aktibidad, agig pagpasalamat na usab sa city government sa Surigao City ug sa mga katawhan niini, nga nagtugot sa mga residente sa Dinagat Islands nga makagamit sa Surigao Boulevard isip pantalan. Dakong tabang ang maong pantalan sa mga Dinagatnon diin mas sayon ug mas makatipid sila sa ilahang regular nga pagbiyahe pagawas ug pasulod sa Probinsya sa Dinagat.
Dungag pa niini, ang pag-apil sa Gobernador sa maong Karatedo Championship nagtumong usab nga magdasig sa mga kabatan-onan nga ipakita ang ilahang mga talento ug abilidad hilabi na sa martial arts, kay ang Gobernador hugot nga ginasuportahan ang mga kabatan-onan, hilabi na sa pagpalambo sa mga interes ug kahibalo niini sa sports.
Mapasalamaton usab si Surigao City Mayor Hon. Paul Dumlao sa presensya ug mainitong pagsuporta ni Governor Demerey sa gipahigayon nga 1st Paul Yves L. Dumlao II and Gov. Lyndon S. Barbers Bonok-bok Festival Karatedo Championship.
(Source: Governor Nilo “Remedy” Demerey Jr. Facebook page)