El Philippine Navy ya salva con el 26 del 32 pasajeros mga 16 horas despues que el barco con casco de madera ta munta sila ya sumi serca na municipio del Turtle Islands, Tawi-Tawi, asegun con un oficial del Lunes.
Si Admiral Francisco Tagamolila Jr., el comandante del Naval Forces Western Mindanao (NFWM), ya habla con el 32 pasajeros ya salva mga alas 10:05 del Domingo denoche 17 millas nautica sur-este del Turtle Islands.
Si Tagamolila ya habla, con el otro seis pasajeros del barco ya sumi nombrao como el M/L Bangsata, ya salva el un barco de Malaysia.
āEn curso el coordinacion para facilita el de ila librao birada,ā si Tagamolila ya habla na un anuncio.
Asegun con Tagamolila, base na cuento del mga sobrevivientes, el M/L Bangsata ya sale desdeāl Turtle Islands mga ala 1:45 del Domingo aga para na South Ubian, Tawi-Tawi, cargando 32 gentes.
Ya dale encuentro grande-grande mareada y ya sumi el barco mga alas 6 del Domingo aga, dejando con mga pasajeros abrasando na astillas hasta el tiempo ya salva canila.
Un petrolero con bandera de Singapore, nombrao como el EONIA el primero ya columbra con el barco angustia y prontamente ya informa el incidente con mga autoridades.
Asegun con Tagamolila, el informacion ya permite con el estacion de seguimiento naval del Philippine Navy na Taganak y BRP-Jose Loor Sr. (PC-390) para inicia un enmidietamente mision de rescate.
El estacion de seguimiento naval na Taganak ya mantene el continuo comunicacion con el EONIA, asegurando el rapido coordinacion y preciso locacion del incidente.
Mientras muntao na PC-390, el mga sobrevivientes ya recivi ayuda medical, comida y ropa desdeāl mga tripulantes del barco.
Asegun con Tagamolila, segurao canila ya transporta y ya llega sila mga 11:40 del Domingo denoche na pantalan de Taganak, donde ya entrega canila na Municipal Disaster Risk Reduction and Management Office para mas del atencion medical y cuidada.
Asegun con Tagamolila, el Navy ta esta firme para garantiza el seguridad maritima y ya apela con el mga comunidades costero y gentes de mar para con cuidao durante el condiciones adversos del mar. (B. Garcia)