Valor de mas de P8.7 millones propiedad el ya destrosa na un incidente de incendio na costa este del ciudad de Zamboanga, asegun con el Zamboanga City Fire District (ZCFD) del Lunes.
Asegun con el ZCFD del Bureau of Fire Protection (BFP) el incendio ya ocuri mga alas 7:46 del Lunes aga na Paseo de Manuel, Zone 3, Barangay Culianan, 13 kilometros este desde’l pueblo de Zamboanga.
El ZCFD ya identifica con el dueño del casa como si Joralyn Otit, residente del mencionao lugar.
Asegun con el ZCFD, con el incendio que ya alcansa na primer alarma, ya puede apaga completamente mga alas 8:03 del aga.
Asegun con el ZCFD, el total destroso de propiedad ya alcansa na P8,750,000.
Asegun con el ZCFD nohay quien ya sinti duele durante el incidente del incendio.
El ZCFD ya continua el investigacion para determina el verdadero causa del incendio. (B. Garcia)