El mga autoridad ya aresta dos individuales de alto valor, o HVI, y ya confisca P442,000 valor de droga ilegal na un operacion contra droga na ciudad de Zamboanga, asegun con el policia del Lunes.
El policia local nohay mas nombra con el dos arestao HVI, exepto de habla’r el uno de ila tiene el edad de 28 años trabajante de construccion, y el otro tiene el edad de 22 sin trabajo.
Asegun con el policia, ambos el dos arestao suspechao mga residentes del Barangay Sta. Catalina, ciudad de Zamboanga.
Asegun con el policia, con el dos suspechao ya aresta na un operacion de compra busto mga alas 6:39 del Sabado denoche na un cuarto de motel na Barangay Canelar, ciudad de Zamboanga.
Asegun con el policia, ya confisca na posesion del dos arestao suspechao 65 gramos de shabu que tiene el valor de P442,000.
El policia ya habla, con el confiscao droga ilegal hay lleva na Forensic Unit-9 del ciudad de Zamboanga para el examen de laboratorio.
El policia ya habla, con el dos arestao suspechao ya detene na carcel del Zamboanga City Police Station 11 en preparacion para el plantada del asunto contra canila por violacion de Ley Integral de Drogas Peligorosas de 2002. (B. Garcia)