El Naval Forces Western Mindanao (NFWM) ya aresta 12 personas y confisca mas de P106 milyones cantidad de contrabando na campanya contra smuggling na provincia del Tawi-Tawi.
Asegun con Rear Admiral Donn Anthony Miraflor, comandante del NFWM, con el mga suspechao ya aresta myentras con el mga contrabando ya confisca del Miyercoles na vicinidad del isla de Baturapac na municipio del Tandubas, Tawi-Tawi.
Asegun con Miraflor ta man patrulya mga personajes del fuersa naval cuando ya columbra sila un lancha nombra como el MB Indah Nadz serca na isla de Baturapac.
Si Miraflor ya habla ya descubri mga personajes na fuersa naval cay lleno de cahon de cigarillo el MB Indah Nadz cuando ya inspecciona sila con el lancha.
Asegun con Miraflor ya puede confisca abordo na lancha 2,798 cahon de cigarillo con el estimao valor de P106,324,000 sin documentos.
Con el lancha, 12 tripulantes, y cargamento ya lleva para na pantalan del Bongao, Tawi-Tawi y ya entrega na custodiya del Buro de Aduana para el propio disposicion. (B. Garcia, photo courtesy of NFWM)