El Senador Francis Tolentino ya habla del Domingo cay el “Philippine ROTC Games (PRG) es un pontene arimienta ambos para patriotismo y lebantada del pais (nation building).
“El desarollo de deportes es un importante aspeto na lebantada del pais. El deportes ta puede ase hunto con mga hente de diferentes antecedencia y cultura, como el cosa ya lleva canaton aqui este dia,” Si Tolentino ya habla durante el ceremonya del abrida del PRG aqui na ciudad de Zamboanga del Domingo.
Asegun con Tolentino, el desarollo de deportes ta ase tamen bueno el salud, buen estado de pensamiento, y cohesion social, hasta ta ayuda tamen creya un sentido de conosimiento nacional.
Puera con Tolentino, ya atende tamen el Vice Presidente y Secretarya del Departamento de Educacion Sara Duterte con el ceremonya.
“El ROTC es un bien potente arimienta para el desarollo de un sentido de disiplina, tabaja hunto y patriotismo que puede ayuda con los jovenes queda mas responsale y productivo vivientes y lideres na futuro,” si Tolentino ya habla.
Asegun con Tolentino un gran significancia el presencia de Duterte durante el ceremonya siendo el vice presidente tiene su advocacia para defende con mga jovenes y desarollo de deportes por medio de servicio militar.
Ta esperansa si Tolentino cay puede realiza de ila igual objeto y el ROTC ay sirvi como un buen fuersa para asegura cay el mga jovenes ay proteje con el pais, lleva unidad y paz y ay queda lideres con integridad y honor. (B. Garcia, photo courtesy of Francis Tolentino Facebook page)