El municipio del Parang na provincia del Sulu librao ya ahora desde’l grupo Abu Sayyaf siguiendo del serye victorioso combate y campanya del militar hunto con el esfuerso de paz del govierno local y otro agencias de seguridad y comunidad.
Asegun con el anuncio del Western Mindanao Command (Westmincom) del Lunes cay con el declaracion ya ase durante un hunta na Barangay Lupah Abu, Parang, Sulu del Byiernes tarde.
Aquellos quien ya atende con el hunta amo canda: Alkhadar Loong el alcalde del Parang; el Vice Alcalde Madzhar Loong; Brigadier General Eugenio Boquio, comandante del 1101st Infantry Brigade; Tiniente Coronel Ray De Lima, comandante del 41st Infantry Battalion; y otros oficiales del militar y pulisiya.
Asegun con Boquio cay el victorioso na limpiada del municipio de Parang desde’l rastro de terorismo ay sirvi como un buen manera para ase mafuersa con el turismo y ay sirvi tamen como el principio del desarollo na municipalidad.
Si Tiniente Heneral Roy Galido, el comandante del Westmincom, ya extende su saludo con el diferente agencias del govierno quien ta contribuji para adquiri el municipio del Parang el estado de librao desde’l grupo Abu Sayyaf.
Ya comenda tamen si Galido con el tropa del militar por el de ila buen trabrajo. (B. Garcia, photo courtesy of Westmincom)