Dose pusil o armas de fuego sin licensia el ya rindi mga candidato para del “Barangay and Sangguniang Kabataan Elections (BSKE) 2023” con el 90th Infantry Battalion (IB) alla na M’Lang, Norte Cotabato, el militar ya anuncia del Viernes.
Asegun con el Western Mindanao Command (Westmincom), con el mga armas de fuego sin licensia ya presenta con Alcalde Russel Abunado del M’Lang na un ceremonia na gymnasium del municipio del Martes na Barangay Poblacion B.
Presente durante el ceremonia el mga siguientes: Vice Alcalde Joselito Piñol del municipio del M’Lang; Abogada Myla Luna, el supervisor de eleccion del provincia; Tiniente Coronel Rowel Gavilanes, comandante del 90IB; y si Police Lieutenant Colonel Realan Mamon, el hefe del policia del M’Lang.
El mga pusil que ya rindi el mga candidato that inclui cuatro shotguns, tres calibre .38 revolvers, dos .9-mm pistola, un calibre .50 Barret Sniper rifle; y dos M-79 Grenade Launchers.
Asegun con el Westmincom, el rindida del mga pusil sin licensia resulta del continuando esfuerso del 90IB, Comelec, y policia del M’Lang para eradica mga armas de fuego sin licencia para el mantencion de paz y stabilidad na lugar y asegura el librao y guardiao BSKE.
Si Major General Steve Crespillo, el comandante del Westmincom, ya comenda con el mga candidato por el de ila cooperacion na campaña contra armas de fuego sin licencia.
“Ta agradece came con aquellos quien ya responde positivamente na de amon llamada de paz, especialmente durante este periodo de eleccion donde ta ase came todo’l esfuerso para eradica violencia relatao na eleccion y trabajando doblamente para el pacifico y enbuenamente conducida del BSKE,” ya habla si Crespillo. (B. Garcia, photo courtesy of 90IB)