Zamboanga: Pulis ya aresta 2 personas ta carga P340,000 shabu

0
8

El inspeccion de un motorsiclo sin registrao placa ya resulta na aresto de dos personas despues que ya descubri mga autoridad ta carga P340,000 valor de droga ilegal, asegun con el policia local del Viernes.

Asegun con Police Colonel Alexander Lorenzo, el Zamboanga City Police Office director, con el dos suspechao ya aresta mga alas 9:30 del Jueves denoche na Barangay Recodo, en este ciudad.

Con el dos arestao suspechao ya nombra lang como un tal Benhar, 43 años el edad, y su ancas, un tal Alvin, 33, ambos mga residentes de Barangay Sta. Maria, Siocon, Zamboanga del Norte.

Asegun con Lorenzo, ta conduci checkpoint mga personajes del Zamboanga City Police Station 9 (ZCPS9), cuando ya ase sila para con un motorsiclo sin registrao placa que ta maneja si Benhar.

Asegun con Lorenzo, accidentalmente ya cay el un diutay pakete de suspechao shabu desde el bag de Benhar cuando ya pidi conele el pulis para presenta su licensia y otro pertinente documentos.

Accidentalmente tamen ya cay un diutay pakete de suspechao shabu cuando ya pidi con Alvin presenta su tarjeta de indentificacion o “identification card”.

Enseguidas ya aresta elm ga pulis con Benhar y Alvin. Asegun con Lorenzo, ya puede recubri 50 gramos de suspechao shabu enpaketao na tres pakete de plastic que tiene el valor de P340,000.

Ya puede tamen recubri dos celpon, dos pitaka, un motorsiclo y otro pa cosas na uso de droga ilegal.

Asegun con Lorenzo, con el dos ya detene en preparacion para el plantada del formal asunto contra canila por violacion del “Comprehensive Dangerous Drugs Act of 2002”. (B. Garcia, photo courtesy of ZCPS9)

Leave a Reply