El Marine Battalion Landing Team-1 (MBLT-1) ya inicia cambio na liderato del su 1st Marine Company (1MC) base na costa este del ciudad de Zamboanga, asegun con el militar del Lunes. Asegun con el MBLT-1, ya instola como el nuevo comandante del 1MC con First Lieutenant Armela Mae Ellar-Gil, quien ya releva con Capitan Mark Baldazan, el interino comandante del 1MC. Si Teniente Coronel Napthalie Papa, el comandante del MBLT-1, ya encabesa con el ceremonia de entrega que ya hace del Sabado na cuartel del 1MC na camino de desvio del Tala na Barangay Lumbangan, ciudad de Zamboanga. Si Baldazan ya expresa su gratitud con mga personajes del 1MC por el cooperacion y camaraderia compartida durante su liderato y ya anima canila para extende igual con el nuevo oficial en-cargao del compania. Durante su liderato, si Baldazan ya encabesa con su compania con alto dedicacion y devocion na servicio. Asegun con el MBLT-1, como un testamento del su competencia, el 1MC ya gana el prestigioso MBLT-1 Best Rifle Company del año 2024 bajo na liderato de Baldazan. Asegun con el MBLT-1, si Gil ya expresa su determinacion para rompe con el malentendimiento sobre oficial mujer para encabesa un compania de rifles marinos. Si Gil ya extende su gratitud con Papa cay ya dale conele el oportunidad para mejora mas su habilidades na nivel tactica. Ademas, si Papa ya enfatiza cay el designacion de Gil es un testamento del capabilidades y fuerza del mujer, solidificando cay el liderato hinde definido por genero pero por competencia, dedicacion, y inquebrantable dedicacion na servicio. Si Papa ya descata tamen el importancia de crear inclusivo medio ambiente donde todo oficial, a pesar del genero, puede demostra de ila potencial para dirigi con corage y integridad. El ceremonia de entrega ta simboliza el transferida del responsibilidades y autoridad para encabesa con el unidad desde’l saliente para na entrante liderato. (B. Garcia)